Tartanka duqa magaalada Minneapolis weli lama soo gabagabeyn, kadib markii aan la helin musharax helay codad ku filan si uu ugu guuleysto wareegga hore ee doorashada, taasoo keentay in lagu celiyo tirinta codadka iyadoo la adeegsanayo nidaamka “ranked-choice voting”.
Natiijooyinka aan rasmiga ahayn ee wareegga koowaad ayaa muujinaya in Duqa hadda jooga Jacob Frey uu hoggaaminayo codadka isagoo helay 42%, halka Senator Omar Fateh uu helay 32%, DeWayne Davis uu helay 14%, iyo Jazz Hampton oo helay 10%.
Nidaamkan codbixinta ee la kala reebayo musharixiinta ayaa ka dhigan in musharaxa ugu codka yar laga saaro wareegga xiga, ilaa uu midkood gaaro 50% ama ka badan. Tirinta cusub ayaa la filayaa inay dib u bilaabato Arbacada.
Frey, oo doonaya inuu markiisii saddexaad xilka ku soo laabto, wuxuu ololihiisa ku saleynayaa xasilooni iyo hoos u dhaca dambiyada iyo kirada oo aan si xad-dhaaf ah kor ugu kicin marka la barbar dhigo magaalooyinka kale ee waaweyn ee Mareykanka.
Ardayda Jaamacadda Minnesota sida Bailey Taylor, oo ah ardayd cilmiga siyaasadda caalamiga ah, ayaa sheegay in ammaanku ahaa sababta uu Frey ugu codeeyay.
“Waxaan doortay Frey sababtoo ah ammaanku waa dhibaato. Ma jecli inaan arko Minneapolis oo noqota sida London oo kale, halkaas oo aan habeenkii ka baqo inaan baxo,” ayuu yiri Taylor.
Dhanka kale, Omar Fateh wuxuu taageerayaashiisa ku kasbaday ballanqaadyo ku dhisan barnaamij dimoqraadi ah oo bulsho, oo ay ka mid yihiin canshuur lagu soo rogo dadka ugu taajirsan iyo xakameyn kirada ah si loo yareeyo culayska nolosha.
Madeline Schwabe, kalkaaliso ka tirsan Isbitaalka M Health Fairview, ayaa tiri: “Waxaan u codeeyay Fateh si loo kordhiyo awoodda nolosha. Qiimaha caymiska caafimaadkayga wuu kacay, waana waqtigii isbeddel dhab ah la heli lahaa.”
Magaalada Minneapolis ayaa wajahaysa culaysyo dhaqaale oo ka dhashay kharashaadka sii kordhaya iyo xafiisyada magaalada hoose oo bannaanaaday, taasoo sare u qaaday cashuuraha guryaha ee muwaadiniinta.
Frey ayaa si adag u taageeraya Taliyaha Booliska Minneapolis, Brian O’Hara, isagoo ku adkaysanaya in dib u habaynta booliska ay tahay mid socda, halka Fateh uu dhaliilay in isbeddelka kuna tilmaamey inuu yahay mid gaabis ah isla markaana aanu ballan qaadin inuu dib u magacaabayo O’Hara haddii uu guuleysto.
Natiijada kama dambaysta ah ayaa la filayaa marka nidaamka kala reebidda codadka uu dhamaado.
